絲絲講場：李嘉誠穩坐香港首富

超人身家增加80億美元

以排名榜首嘅李嘉誠為例，佢嘅財富達到300億美元，一年內增加咗80億美元，幅度達到36.36%；四叔李兆基以200億美元財富位列第二名，較舊年增17.6%。

絲絲發現，今年嘅《福布斯》香港富豪榜，人數由舊年嘅四十人增加至今年嘅五十人，該刊話係反映對本港富豪來說係景氣良好嘅一年。舊年能打入四十大富豪榜嘅富豪，只有37人嘅財富超過10億美元嘅門檻，今年排名五十嘅楊敏德家族，其財富亦剛好維持於10億美元。

本港地產商中，除李嘉誠有80億美元嘅財富進帳之外，恒地李兆基、新地郭氏兄弟、新世界鄭裕彤的財富亦有介乎10億至38億美元嘅增長，九倉（00004）主席吳光正嘅財富，更急升逾1.35倍，排名由十一位躍升至第七位。受惠澳門賭業蓬勃，嘉華國際（00173）主席呂志和，排名由第八上升至今年嘅第五位。

大劉捲澳巨貪案惹關注

相反，被澳門控以行賄及清洗黑錢罪嘅華人置業（00127）主席劉鑾雄，本周又稱病沒有出庭接受審訊，佢喺榜內嘅排名由去年嘅第五，下跌至今年嘅第八。自從劉鑾雄捲入澳門歐文龍巨貪案後，華置先後出售多項資產套現，包括物業及上市公司股份，合共套現51.18億元。事實上，華置嘅財務狀況甚惹關注，據中期業績報告顯示，總借貸嘅246億元之中，六成屬一年內到期之貸款，相當於146億元，較半年前大增46.75%。

令劉鑾雄惹上官非的澳門「御海‧南灣」項目投資，華置並沒有在中期業績中作撥備。截至六月十七日為止，華置於該項目的投資額約為28億元，分析員認為，這些投資極可能「收唔番」，華置應該在其業績帳目中作出撥備。換言之，若涉貪地皮最終被沒收，華置最多可能撇帳28億元。

女性富豪方面，何鴻燊家族亦有兩名成員入榜，當中「四太」澳博（00880）執行董事梁安琪就排第廿四，其財富較之前一年增長31%至21億美元。而在富豪第二代方面，電盈（00008）主席李澤楷則以18.5億美元排行第廿八。

余詩韻