Market Insight：中化肥 價值未反映

個市雞犬皆升，看官可能以為古勝可輕輕鬆鬆作推介。不過幻想同現實永遠係兩碼子的事，你話卡姆丹克（00712）與保利協鑫（03800），過去七日基本因素是否有戲劇性轉變？點解咁差嘅業績，股價可以幾日之間狂升86%及44%，乾炒之外，真係無其他理由，假如本文能夠好似馬經波經，交幾個名同冧巴搞掂，真係會慳番唔少時間，近日，由散戶至投行分析員都瘋狂發掘仲有炒作故事股票，要搵上文下理解釋原因，非大家所想咁易。

做投行有苦自知

每年一月底、二月初都係基金經理透過調查機構Institutional Investor（II），投票選年度最優異表現分析員的日子。分析員無論搵工跳槽，同老板討價還價，甚至傾花紅都靠晒這份II成績表。行規是這段時間，大家無所不用其極，碌爆人情卡，飲酒食飯在所難免，中環星級食府，近排食晏時段一枱難求，同搶票期不無關係。

放大圖片

放大圖片

昨日收到分析員拉票「依貓」，開首一段寫着：「在社會一片歌舞昇平的背後，我們在投資銀行裏面正面對嚴冬，人間有情，請您伸出同情之手幫助我們……（下刪三千字）」。這封出自歐資分析員手筆的電郵，未知有幾多人收到會同古勝一樣笑了出來，成為昨日一大笑點。

然而，想深一層，普羅大眾以為投行賓架年薪數百萬地位超然，顯然屬假像。事實上，金融海嘯之後，行業去槓桿化情況嚴重，投行生意傷了元氣，炒人多請人少，認識行內賓架唔少被裁之後，搵工極為困難，低聲下氣討票也是適者生存，保飯碗所為，或者一般打工仔依然覺得投行賓架地位令人羨慕，但實情行業高峰早已在○六、○七年時成為歷史。

航運股有胡就食

內地公布去年十二月份進口增長6%，出口增長14.1%，兩個數字遠高於市場預期的3.5%及5%，一眾大落後的航運及航空股，股價統統有唔錯進帳。毫無疑問，以市帳率計，目前大部分航運股估值處於相對低水平，可是睇番反映環球乾散貨運費的波羅的海指數，十月及十一月份在1,100點樓上出現雙頂之後，又回到大約700點附近，昨日在743點，由高位跌近三成三，差不多回到九月低位，撇開內地十二月意外咁好的數據，環球航運市場氣氛相當一般，追這批股票宜短不宜長。

三農是中央政府長期傾斜的老問題，今年《一號文件》，強調發展創新農業生產體制，走專業化，扶持聯合經營及家庭農場，加埋早前審議的《一三年關稅實施方案》，降低氮肥及尿素等出口關稅，種種宏觀因素，都對內地化肥龍頭中化化肥（00297）有利。

今浪中化肥升幅唔多，自去年十二月股價自1.6元起步之後，升勢相對穩定，現價2.08元相當於一三年市帳率及市盈率分別係0.8倍及12.1倍。過去十年，其往績市盈率介乎9.5至50倍之間，行業處於毛利率改善周期，相信中化肥有被重估的條件，於2元左右入市中線應該會有唔錯回報，冇心水者可以留意。

東風有條件翻撻

呢輪炒家主攻嘅新能源股，光伏股熱炒，風電股亦已開始接力，昨日提及嘅中國風電（00182），短炒目標即日實現。

此外，內地公布貿易數字後，航空、航運同汽車股都有發力追落後嘅迹象，汽車股中，廣汽（02238）昨升6%，食住條水，可以考慮翻撻東風集團（00489），畢竟股價才剛重上250日線，要發力起動嘅話，相信好快重上14元，回吐12元邊已由阻力位變成支持位。

古勝