絲絲識得嘅朋友當中，十個有八個手上都拎住蘋果公司（Apple Inc.）嘅產品，到底呢間公司規模有幾大，都大概想像得到。想像歸想像，最近絲絲直頭搵到一啲實證，證明蘋果喺IT界嘅一哥地位。
話說蘋果同好多上市公司一樣，都會定期檢討公司高層嘅薪酬，佢哋嘅做法就係搵番其他同業做比較。不過要成為蘋果口中嘅「同業」都要有番一定分量，即係佢哋嘅收入同市值都要有蘋果嘅五分一，先可以納入比較行列。
不過依家蘋果已經係全球最值錢嘅公司，年銷售額高達約1,570億美元（即係大概1.22萬億港元！），絲絲計一計數，能夠達到呢個「五分一」標準嘅公司真係唔多。為咗令到薪酬比較「行得通」，蘋果早前就向美國證交會提交一份文件，內容就話蘋果會降低要求，只要同業公司嘅收入同市值分別達到150億美元（約1,170億港元）及250億美元（約1,950億港元），蘋果都會參考佢哋嘅薪酬水平。
不過蘋果仲想要多層保險，所以亦提出設立另一張名單，將收入達到750億美元（約5,580億港元）、市值達到1,500億美元（約1.17萬億港元）嘅非IT業公司納入名單做比較。咁嚟計，股神巴菲特嘅投資旗艦巴郡、通用電氣等大公司都叫做榜上有名。絲絲覺得，蘋果要自降身價先做到薪酬比較，可見佢喺行內真係傲視群雄！