唔少財金界人士每逢年底都要清假，趁機去吓旅行叉叉電就最啱。瑞信香港認股證及牛熊證銷售主管何啟聰（Ivan），同埋耀才證券市場研究部副經理植耀輝（Stanley），就咁啱近期都去咗日本玩番轉。
Ivan講，去過日本旅行六、七次，有段時間更係每年去兩次，真係去極都唔厭。今次重遊，佢就將睇景點嘅指定動作，轉變為尋找美食之旅，更喺出發前做定功課，編好「搵食路線」。最愛食日本菜嘅Ivan，喺香港已經周圍搵優質同價廉物美嘅日本料理，今次只係將「戰線」延伸到日本，如到京都食懷石料理、到神戶品嘗神戶牛，以至去尋找正宗嘅天婦羅。除此之外，Ivan話自己都會喺當地超市買壽司同刺身，佐以清酒，價錢合理之餘又可體驗另一番滋味。
至於Stanley，近期就去咗日本沖繩鬆一鬆，仲話一定會再去。原因？就係再去探鯨鯊。Stanley講，雖然佢唔識游水同潛水，但就由細到大，都好鍾意海洋生物。今次佢同太太去沖繩著名嘅美麗海水族館。而Stanley最難忘嘅，就係近距離睇到三條巨型鯨鯊喺水中漫游，震撼嘅情景係本地睇唔到嘅。不過，佢話美中不足嘅係，由酒店去水族館嘅車程應該唔使一小時，但係乘巴士來回就要花六個鐘。Stanley同絲絲講，有時間佢打算去學揸車，一於自駕遊日本啦。