絲絲講場：趙麗娟計任會長
依家女性喺社會上嘅地位愈來愈高，一向由男性做主導嘅會計師公會，新任會長也由女性出任。唔講唔知，新會長趙麗娟係該會自一九七三年成立以來，四十年來首位女會長，佢更加係少數來自商界能出任會長一職。事關會長歷年來，多數都係由會計師事務所嘅人士出任，四十年來，只有數名來自商界嘅代表出任過會長，好似周光暉、甘博文、馮英偉等。所以今次趙麗娟當上會長，可謂打破傳統。
利豐馮氏兄弟支持
趙麗娟本身係利豐發展（中國）嘅董事，主力負責中國政府關係同業務發展。佢坦言，商界唔同會計師事務所，出任會長同業務關係冇咁直接，幸好佢公司兩個馮博士，即係馮國經同馮國綸，好支持佢出任會計師公會會長，唔介意佢放多啲時間喺公會嘅會務上，覺得係對社會一種回饋，令佢可以放心全力做會長。
醞釀多年登上寶座
雖然話會長任期只有一年，好多人都有機會做會長，但事實上，要登上會長寶座，一般都要喺公會嘅理事會做六至八年，好似趙麗娟咁，○四年開始已加入理事會，到二○一二年尾才坐正，足足要八年！仲未計佢○四年之前已加入公會旗下委員會幫手。所以絲絲話，如果冇公司支持，點可以喺公會服務咁長時間。
講開香港正係同內地傾緊釐清國家機密定義，同向內地會計師索取底稿可能性，趙麗娟就回憶起多年前一段小插曲。
話說當時佢去內地做審計工作，「好自然」咁將財務報表影印一份帶出境，竟然被指攞取國家機密，最後當然係擺平，但反映國家機密原來唔係新嘢，多年前已有發生！
余詩韻