金融徐筆：TSC集團實力提升
早排一眾頁岩氣概念股又再借好消息炒上，連帶其他與油田服務相關嘅股份亦一同炒上，好似隻TSC集團（00206），股價由月初低位一路升上52周高位。除咗因為板塊氣氛做好外，集團早前都宣布同中、外企業組成戰略合作協議，股份成交大增。
TSC主要從事生產及銷售鑽機、處理設備、提供海洋鑽機之總包工程，佢兩間合作夥伴分別係廣州中船黃埔造船同Zentech Incorporated。中船黃埔係附屬中國船舶工業集團公司，具有160年建造船舶歷史，為中國最大船廠之一；Zentech係一間工程公司，喺升降台及管道方面累積逾30年經驗，並喺新鑽井技術最新嘅創新及先進設計方面擁有多項知識產權。
新一代鑽機添商機
集團同佢哋訂立咗自升式鑽井平台戰略合作框架協議，Zentech負責鑽機設計，TSC則負責鑽機相關設備總包嘅供應、委託經營同售後服務，而中船黃埔則負責綜合鑽井平台建造。今次結合三方嘅核心強項，Prof. J相信佢哋可以各司其職，滿足目標新興市場客戶同國家油氣公司需要。
集團話呢款新一代嘅自升式鑽機將會為今日至未來喺自升式鑽機市場帶來價格相宜、而技術上證實可行嘅另一選擇。呢樣「新武器」將會有助TSC擴闊佢嘅水深超過300至500英尺運作嘅鑽機總包同綜合設備市場。
每個成功企業都要搵到屬於自己嘅一片天，Prof. J覺得攞咗知識產權有保障好多。如果一如集團所講嘅水深300至500英尺係有發展空間，咁呢項專利將會為佢打開一片藍海。
香港大學電子金融服務榮譽助理教授 徐燦傑