中國人成日都話「身體髮膚，受之父母」，所以一般都好愛惜自己身體，但係建福（00464）主席林偉明就同絲絲講，呢樣嘢成為咗佢哋開拓內地市場嘅障礙喎！
事關建福主要業務係製造美髮用品，而除咗一般嘅風筒之外，佢哋嘅產品都包括捲髮夾同直髮夾呢啲造型產品，但係呢啲產品暫時喺打入中國市場上面有困難。
林偉明就話，困難就在於中國人好驚傷頭髮，佢哋見呢啲產品一夾落去頭髮會出煙，都已經驚咗唔會買，所以暫時都未可以打開中國市場。
不過林偉明就話，雖然係咁，但佢哋都會嘗試去研發一啲新產品打開市場，例如依家佢哋喺日本有一隻產品係連埋支營養水一齊用，用嘅同時可以做埋護髮，佢哋都希望日後引入呢類產品到中國。
佢仲話，依家佢哋喺中國賣緊隻風筒，係識得自動調節溫度嘅，唔驚啲風太熱會傷頭髮，賣到近千蚊一個都好好賣，照咁睇護髮呢個point喺中國確係有得做！