阿里巴巴董事局主席馬雲前日參加二○一二中國民營企業峰會嗰陣，因為塞車遲到要全場等佢一個，令會議推遲10分鐘先開始，但點知最後竟然係浙江省委書記夏寶龍向佢道歉，仲承諾5年內解決全省交通擠塞嘅問題，認真峰迴路轉！
事緣當日作為頒獎嘉賓嘅馬雲，本來由近郊餘杭開車到杭州市區嘅人民大會堂參加峰會，但因為沿途塞車，結果花咗一個鐘零四個字先去到。
原本9點準時開幕嘅會議亦特登等埋呢位大人物，直至9點10分央視主持董倩先慢慢行出嚟解釋，話因為省長、書記要等埋馬雲先開始，令到現場一眾企業代表「O嘴」！
到馬雲上台嗰陣，董倩仲問多佢一次點解遲到，搞到馬雲鬼咁尷尬，唔知台下嘅省委書記夏寶龍係咪驚得罪佢，之後上台親自向馬雲道歉！佢話塞車唔係馬雲嘅問題，而係佢嘅問題，仲言之鑿鑿話，5年後馬雲如果由餘杭去人民大會堂，只需要20分鐘！大家一聽到佢咁講，都忍唔住高呼「好！」，全場掌聲如雷，企喺一邊嘅馬雲亦因為有下台階而笑逐顏開。
絲絲覺得夏寶龍呢一招真係高，既唔會落馬雲面，又唔會得失其他與會者，輕易拆解呢場小插曲，轉數果然夠快！
余詩韻