孖妹S檔案：券商開Party盼明年股舞

會展聚餐進軍國際

周：致富證券董事總經理周松堦

高妹：周生，你們剛於會展舉辦聖誕聚餐，當日大大話話有廿多圍酒席，場面相當熱鬧呀！

周：臨近年尾，大家可趁這個大時大節好好盡興一番，我們安排咗好多活動o架，有唱歌、魔術表演等，個個都玩到樂而忘返！

高妹：我自己就最鍾意抽獎環節喇，我見你同周太二人各攞一萬蚊出嚟抽獎，可惜……可惜抽唔中我啦……

周：哈哈，當晚有九十份獎品，計落有三分之一嘅中獎機會，除咗現金獎之外，仲有不少電子產品等獎品，可能你差少少彩數啦，但唔緊要o架，可以寄望下年！

高妹：好呀！當晚的菜式好豐富呢，又有乳豬，又有鮑魚同魚翅，周生你都冇因市道唔好而「慳皮」呢，當日埋單使唔使廿萬呀？

周：起碼要三十萬！難得一班員工咁拚搏，我又點會吝嗇！另我哋每年都會頒授員工服務獎，每服務五年及十年都會獲頒金牌，今年就頒發咗三十面五年金牌及三面十年金牌喇！

高妹：嘩，周生，你對一眾員工相當體貼，難得依家啲金價咁貴，你仲可以保持這個傳統！話時話，新一年將至，你有甚麼大計？

周：我哋將會走向全世界，所以我近排經常周圍飛，以發掘出具增長潛力的投資市場！

高妹：咁孖妹祝你大展鴻圖！

星展搞完周年晚宴，接着再搞聖誕派對。

信誠較注重春茗，聖誕節後會着手準備。

周年晚宴坐滿亞博

朱：星展銀行推廣策略與傳訊部 高級副總裁兼總監朱伊蓮

彩兒：你哋上個月的Annual Dinner（年度晚會）好墟冚喎！

朱：Annual Dinner係公司一年一度最大型的活動，總共會有3,200多人出席，所以我哋每年都會在場地較大的亞洲博覽館舉行，而同事們亦會悉心打扮赴會。今年我哋仲製造咗一個大驚喜，CEO與一眾管理層同事一起大跳熱遍全球的騎馬舞，掀起全晚高潮呢！

彩兒：哈哈，好正呀！今年你哋點止出力，仲出埋錢喎！

朱：其實公司每年都會有一隻勞力士手錶作為大獎，但今年想額外表達對同事的謝意，所以我哋咁多位manager再夾多一份旅遊大獎，幸運嘅同事可以獲得雙人地中海郵輪之旅o架！

市道麻麻 沒減預算

彩兒：嘩，我仲以為今年的市道麻麻，各公司會大cut budget（削減預算）添！

朱：要搞一個大型項目的確所費不菲，齋訂場地酒席，再加埋各項雜費便要以百萬元計了！

彩兒：你哋銀行的活動多籮籮，除咗Annual Dinner之外，亦於上周四下午舉行聖誕派對！

朱：係呀，由於公司亦很重視同事的家庭生活，上周的聖誕派對係專畀同事們的囝囝囡囡參與。活動中還有小丑、魔術師及聖誕老人搞氣氛。

交易房300人齊慶祝

于：瑞銀亞洲股票衍生產品銷售部董事總經理于正人

高妹：你哋今年好早就預祝聖誕節！

于：公司每年都會分組搞party，我哋整個trading floor約有三百人，已於13號慶祝聖誕喇！大家辛苦工作了一年，咪趁年尾大事狂歡一下囉！今年計，大市淡靜之餘，恒指的上下波幅僅約4,600點，同事們都要加倍努力才可爭取業績表現，好彩第四季個市有復甦迹象。

市況淡靜 輪證食胡

而在如此低迷的市況下，公司窩輪及牛熊證的市場佔有率均有上升呢！

高妹：你要多謝一班好同事幫你搏殺！

于：當然啦！我哋今年喺蘭桂坊一間樓上餐廳包場，並提供自助酒水菜式！當晚不少同事都飲飽食醉，樂此不疲！去到抽獎環節更特別令人興奮，今年總共有十份禮物，老闆仲特意買咗部iPad Mini作為其中一份大獎，不過我冇抽獎運，咁耐以來都未試過中獎！

高妹：計我話，最興奮係表演環節，可以見到你大跳騎馬舞兼大唱「Gangnam Style」！

于：哈哈，我哋今年有跳舞比賽，咁我當然揀隻至Hit（熱門）嘅歌曲啦！

高妹：不過，今年股市交投低迷，明年又會如何呀？

于：無疑今年的成交量受外圍經濟拖累，但隨着歐債問題及美國財政懸崖危機漸見改善，加上A股能重拾升勢，明年的市況有望好轉！

經紀散戶打成一片

王：信誠證券基金經理 王海翔

彩兒：今日得半日市，你哋係咪會喺公司張燈結綵開Party慶祝聖誕節？

王：我哋以往會喺收市之後叫到會，好讓一眾同事及散戶可以輕鬆一下，但今年老闆諗住搞新意思，或會個別與同事聚餐，更可促進感情呢！其實，老闆最注重的是春茗，過咗聖誕節之後，我哋就會着手籌辦春茗o架喇！

彩兒：你哋會「與民同樂」，不少座上客都係股民呢！

王：春茗當晚將有50圍酒席，當中10圍畀自己同事，剩下的會留給賓客！因老闆相當着重客戶的情誼，所以我們會特意挑選出成交量最高的數百位客人一齊大吃一頓，上年仲搵到公司成立以來的第一個客戶參加，確實相當難得o架！

高妹、彩兒

若有料報畀高妹同彩兒或有嘢問，可電郵money.biz@opg.com.hk