Market Insight：中興通訊值博率高

上星期五，港股行先一步，早市因為美國眾議院的B計劃押後表決急挫，恒指跌153點，收報22,506點，好友一個唔該，藉消息鎖定手上利潤。觀乎十二月期指，成交激增至11.2萬張，是本月以來最多，由轉倉之頻繁，低水幅度見轉好倉相對積極，似乎大孖沙都傾向財政懸崖最後有驚無險，港股狂牛仲未有意思停下腳步。

臨近年尾，又到計計一年得失之時，唔經唔覺，今年港股由18,434點，去到上星期五收市的22,506點，累積兩成二升幅，假如讀者投資組合，今年有接近升幅，真要恭喜閣下！因為你們今年比近八成基金經理嘅回報更加理想。周末，古勝同基金朋友傾開，今年芬佬跑輸大市情況，比過往幾年更嚴重，有一成至一成半回報，已經要開香檳。

放大圖片

放大圖片

基金跑輸有原因

芬佬大多數的解釋，例如A股「彈得太遲」，使他們眼白白睇住九月H股已開始掉頭回升，也未敢放膽入市；亦有云市場升勢太集中在個別板塊，像本地地產、內房、頁岩氣等，傳統上要做到分散注碼，基金不能高度集中的「原罪」，令他們吃大虧。

古勝認為更大的理由，係唔少基金經歷金融海嘯後的驚濤駭浪，食驚風散食到飽，唔少追求絕對回報基金，遲遲未番到water mark（基金單位歷史高位）樓上，惟有抱住戰戰兢兢嘅心態，少做少錯，面對第四季這類大家摸住石頭過河的轉角市，miss的機會更大。

姑勿論點，多年經驗話畀我地知，基金經理同散戶最大嘅分別，係他們擁有超強募集資金能力，更多人願意將身家交予他們託管，可是，同最終投資表現關係唔大。唔想自己落手落腳揀股票，又怕所託非人，最低成本方法仲係揀市場指數基金（ETF），好似盈富基金（02800）、南方A50（02822），安碩A50（02823）及華夏滬深三百（03188）一類，至少年結時你知道，你回報會勝過八成跑輸指數的基金投資者。

今年最最最落後的股份，要數電訊設備股，像中興通訊（00763），現股價只及年初一半左右。

近兩季業績顯示，困擾設備股的原因，包括中國3G投資開始成熟並趨向放緩、歐洲電訊投資受經濟疲弱影響、以及美國國會早前指責中國兩大設備供應商危害國家安全的莫須有式指控，說穿了，不過是出口術阻擬內地設備企業，挑戰歐美公司的壟斷，染指海外合約。

最壞時間已過去

中興第三季勁蝕19.45億元人民幣，令首三季累積盈轉虧，蝕17億元，管理層承諾大刀闊斧透過裁員削減開支、縮減毛利率低的項目、重塑產品線，分析員預期中興最壞時刻已過，明年業績反彈可期（由今年3至5億，回復至20億元人民幣樓上）。

近期有報告估，隨着內地三大電訊商3G滲透率開始達到規模效益，4G設備的投入可能提早啟動，令捱緊打的設備供應商可以提早度過寒冬，中興股價九月初短暫跌穿10元後，很快就重返11.5至13.5元的橫行區，相信未來六至十二個月，向上突破的機會遠高於再試低位，值博率其實頗高。

金威搭轉順風車

金威啤酒（00124）話擬出售啤酒廠經已講咗成年有多，但至今仍未成事，股價喺今年三月炒到上3.3元，一路都係只聞樓梯響，其後股價隨大市回落，七月份見低位2.13元。

今個月以來股價始再度發力，上周五逆市升2.8%，收報2.92元，係咪洽售主要資產有進展，不得而知，但睇勢股價有力重遊今年高位，可以小注跟搭順風車，支持位可參考10日線2.75元。

古勝