王亞偉可以話係近期內地最紅嘅基金經理，事關佢憑住明星效應兩三下板斧，就輕鬆為佢自己第一個私募基金籌到二十億元（人民幣‧下同），打破咗李旭利之前十一億元嘅最高紀錄，而且產品嘅管理費亦高達百分之二點五，即係話王亞偉一年淨收管理費都有五千萬元﹗
王亞偉曾經係華夏基金嘅「公募一哥」，多年嚟為客戶爭取到可觀嘅投資回報，建立到可信嘅口碑，今次由公募轉戰私募，業內人士紛紛睇好，用資金表示支持。
王亞偉首隻私募產品今個月十三號已經開始發行，為期約一星期，產品全名為「外貿信託昀澧證券投資集合資金信託計劃」，國信證券同招商銀行係今次嘅銷售機構，各代銷十億元，目前招商銀行已經募集完畢。絲絲聽聞今次限額二十億元係王亞偉自己嘅要求，如果無限制，分分鐘一百億元都募集到﹗
有國信證券嘅內部人士話，呢隻私募產品封閉期為六個月，認購費為百分之一，而超額收益提成就收百分之二十，同目前內地嘅私募產品行規差唔多，但百分之二點五嘅管理費則相對高昂。內地一般私募產品都係收百分之一至百分之一點五管理費，百分之二點五係去到私募產品嘅最高值，難怪有人會話王亞偉就算一年咩都唔做，都可以賺五千萬元啦﹗