絲絲講場：滙控查身份得罪英男爵
滙控（00005）已痛定思痛要搞好內部監控，但近排就畀英國上議院嘅議員狠批「無腦」，事緣有位幫襯咗佢三十年嘅議員，竟然被銀行要求睇Passport同電費單，滙控今鋪真係有啲矯枉過正喇！
嗰位被check嘅議員喺議會上好勞氣咁話，佢哋無理由連一個英國男爵同墨西哥毒梟嘅護照都唔識分吓嘛？講到興起，佢連蘇格蘭皇家銀行都唔放過，直指好似佢哋呢啲怪獸銀行，唔單止係「大到不能倒」，直情係大到不能夠監管同控制。
男爵夫人寸美國過分
今次滙控咁蝦碌，財政部嘅官員都叫佢哋要醒定啲，仲話英國有全世界其中一個最完善嘅反洗錢制度，應該唔會有咁嘅事發生至啱。
有位男爵夫人就話，舊年英國銀行已經交咗64億英鎊罰款畀美國監管機構，比起交畀英國金融服務局嘅1.4億英鎊，真係多好多倍，仲要有啲弦外之音咁話，英國只會檢控唔廉潔同違反公平交易嘅銀行。
點都好，絲絲希望滙控今次真係可以吸取教訓，唔好再犯啲低級錯誤喇！