對沖基金一向畀人神秘同負面印象，但其實佢哋都有做慈善o架，好似絲絲尋日應邀去咗對沖基金成立嘅兒童基金「Rice」嘅籌款晚會，到場嘅對沖基金公司代表幾十人，由歐、美、日、中、港、台都有，但都強調係低調經營。
好似其中一個主要捐款人源富投資管理，二○○○年響香港成立，聽講捐咗唔少錢，公司董事長王華麟係台灣人，強調做對沖基金要低調，但都會做慈善，捐錢畀有需要人士，問佢捐咗幾多，佢就笑笑口話「好少錢啫」。
另外幾位基金經理就同絲絲呻，呢兩年個環球市道波幅細，政治干預同突發事件太多，其實不利對沖基金經營，好多對沖基金都蝕錢或者倒閉，但仍有好多不同人士嚟香港開對沖基金搵機會，部分成立時可能只得幾球錢貨底。
Rice個名好得意，即係Returns Invested in Children and Education，意思係回饋社會同投資兒童教育，個基金早喺○六年由亞洲嘅對沖基金成立，資金用於改善柬埔寨、中國、印尼、老撾、尼泊爾、泰國同越南兒童嘅生活。