絲絲講場：宏利吳智珊過溫暖聖誕

天文台話今年香港有個好凍嘅平安夜，不過宏利公積金信託首席行政總監吳智珊（Luzia）就會喺今個禮拜五（瑪雅人聲稱嘅「世界末日」）飛去新西蘭，度過一個好warm嘅Christmas，仲會睇埋一三年嘅曙光，先至返香港繼續拚搏！

雖然仲要返工，不過Luzia身上已經散發出強烈嘅holiday mood，佢同絲絲講，「末日」當日下晝會同一班員工開party預祝聖誕節，之後就飛去新西蘭，同仔女渡過一個暖笠笠嘅聖誕。

今次係Luzia第一次去新西蘭，有得去旅行，加上宏利嘅強積金生意又咁好，心情唔怪得之咁靚，絲絲仲知道Luzia鍾情紅酒，新西蘭咁多酒莊，正合佢心意！

聽講，今次旅程由佢一對仔女策劃，不過，佢仍然堅拒笨豬跳、激流呢啲咁刺激嘅玩意，佢只會盡情wine and dine咁話喎！

除咗享受美酒佳餚，Luzia仲會率先見證一三年嘅第一道曙光，相信明年一定朝氣十足呀！絲絲喺度亦預祝Luzia有個美滿嘅假期！