港交所（00388）前行政總裁周文耀（Paul）做咗數碼港主席，唔經唔覺已近兩年半。喺阿Paul嘅領導下，數碼港推動香港資訊及通訊科技（ICT）發展，成績有目共睹，就好似八年前十四歲獲科大破格錄取嘅「星之子」陳易希同學咁，佢大學畢業後咪就透過數碼港嘅培育計劃，以開發流動應用App創業，做埋老闆添。不過，絲絲得知，原來阿Paul喺數碼港仲有一項不為人知嘅重大貢獻，就係為數碼港印發成立以來，首份公司年報！
數碼港啟用至今已經十一個年頭，作為半官方機構，數碼港每年嘅帳目雖然都會向立法會交代，但未知係咪為咗節省成本，數碼港過往一直未有如其他半官方機構咁，印發年報向外披露每年「業績」。阿Paul就話，佢上任後同董事會都認為，數碼港應更積極向社會披露具體發展，所以就促成數碼港首份年報嘅出版，而數碼港喺尋日嘅年度傳媒午宴上，本年報就已即場派發。
殊不知呢份數碼港嘅首份年報，披露至今年三月止嘅財年，數碼港嘅虧損達1.34億元，而且「蝕錢」程度較之前一年有所增加。
年蝕過億咁大件事，傳媒當然問完又問啦！結果要阿Paul多次解釋，數碼港「見紅」係由於保守會計處理，管理公司每年要為數碼港嘅資產，作逾2億元折舊攤銷，如果唔計呢項，數碼港過去一個財年其實有7,600多萬元盈利o架。
余詩韻