領匯（00823）尋日同理工大學合作舉辦咗一個商場管理行政文憑課程，搵嚟城中猛人馬時亨教授當中嘅財金科目。好多人都記得馬時亨○八年七月因健康理由辭任財經事務及庫務局局長一職之後，隨即喺○九年十一月獲委任為中策集團（00235）嘅非執董，可謂峰迴路轉。不過，如果大家想一睹馬時亨教書嘅風采，可能有啲難度嘞。
因為據理大副校長徐林倩麗講，馬時亨係「原則上」應承咗佢去擔任呢個行政文憑課程嘅其中一位老師，但馬時亨負責嘅企業財務管理、融資等科目要到一四年四月先至開班，由依家至到一四年仲有大把時間，所謂貴人事忙，當中或者會出現變數。
而且呢個課程第一次收生，將會全數取錄領匯嘅管理級員工，暫時未對外開放。領匯行政總裁王國龍就話，第一批將會有40位員工就讀，公司會全數資助佢哋嘅學費，涉及金額大概300萬元，佢仲講笑話，希望兩年後呢批人畢業後，有人可以頂替佢嘅職位喎。