恒隆系最近唔知做乜，連續兩日有董事辭任，前日先有老臣子姚子賢辭任恒隆地產（00101）執董，尋日再有高伯遒連環辭任恒隆地產同埋恒隆集團（00010）兩家公司嘅執董職務。咁啱得咁蹺，兩日嘅上市公司通告都好相似，都係話董事辭職係想有更多時間投放喺「私人事宜」，公司亦都未安排兩位嘅替任人選。
咁啱兩位董事都只係五十幾歲，未到退休年齡，咦？究竟恒隆係咪有人事鬥爭？絲絲當然第一時間致電佢哋公關部，可惜公關部都冇乜進一步嘅消息可以透露，只係重申兩人辭職係「私人理由」，如果有繼任人選，喺適當嘅時候會向外公布。
講開高伯遒，佢九四年加入恒隆，最為人記得嘅係○九年八月佢同另一位董事袁偉良，各自買入兩個「君臨天下」嘅單位，共涉資8,457萬元，以行動嚟支持公司嘅物業發展。近幾年，高生就比較多回答公司喺內地發展項目嘅情況。