有「保險教父」之稱嘅楊梵城（Andrew）原本諗住喺民豐控股（00279）大搞保險業，最終成泡影，其後買返民豐旗下經營保險經紀嘅業務。絲絲尋日見到「教父」，以為會「索」到佢最新嘅鴻圖大計，點知教父好謙咁話「由細做起」，以佢嘅背景，真係講都冇人信。
Andrew舊年辭任民豐主席後一直專心打理自己嘅保險經紀生意，不過規模同當年盈科保險仲有段距離，有無諗住請番多啲員工一齊大展拳腳先？
佢坦言除非有咩大機遇，好似大圍經濟超乎預期咁好，又或者碰上合適嘅合夥人，否則唔諗住大搞喇，「就好似我啱啱入行咁，大嘅總要由細做起。」
保險業一向競爭激烈，見慣世面嘅Andrew對保險業前景仍然樂觀，佢話「只要人有生死，（保險）就永遠有得做」。
佢又話競爭固之然有，但唔同公司嘅產品都唔同，最重要始終係有人才，好似友邦（01299）咁成功正因為佢哋叻人多。
當年李澤楷收購新加坡鵬利保險（其後易名盈科保險）時，就邀來財金高手袁天凡任主席，又搵當時國衞保險（現稱AXA）CEO楊梵城任副主席，兩人喺短短三個月內，從國衞帶走300代理加盟鵬利保險，據聞最終有600人跟佢過檔，激到國衞紮紮跳兼且入稟控訴添。
李澤楷最近成功收購ING港澳及泰國業務，唔知會唔會再同Andrew合作呢？
余詩韻