絲絲呢幾日聽到電腦界嘅朋友話，微軟全球總裁鮑爾喺上星期四（6日）低調去咗北京，仲喺聯想集團（00992）CEO楊元慶嘅屋企傾咗幾個鐘密偈添，聽聞雙方有合作機會咁話。
不過兩間公司市值相差廿幾倍，到底有咩合作空間呢？絲絲再問之下，原來最近微軟處於轉型時期，但就遇上唔少困難，所以想搵聯想做拍檔幫手。微軟嘅作業系統一向都針對桌上電腦，但近年唔少電腦商好似惠普咁，都轉型發展流動產品，丟低桌上電腦嘅市場，令到微軟嘅「戰友」逐一減少；加上微軟最近推出嘅心血結晶Windows 8，喺市場上反應麻麻，所以總裁都要出動去搵「救兵」。
微軟睇中聯想嘅原因非常簡單直接：聯想喺電腦市場地位日漸增加，更成為全球桌上電腦出貨量第一嘅公司，對於微軟嚟講係一個好有潛質嘅生意夥伴。如果雙方合作，微軟可以有銷售渠道，聯想又可以得到技術支援，可以話係雙贏情況。
雖然兩間公司對會面或合作一事都未有回應，但如果真有其事，絲絲相信到時電腦界又會出現一番新景象。
余詩韻