A股最近係威係勢，查實十二月前只係死唔斷氣，傷盡股民嘅心，就連腰纏萬貫嘅中國富豪，身家財富都受拖累。
根據中國證券報統計，A股十大富豪持股市值合計蒸發373億元（人民幣‧下同），降到1,255億元，身家平均大跌兩成，真係欲哭無淚喇！咁雄踞A股富豪榜首嘅中國三一重工董事長梁穩根，雖然今年繼續輕輕鬆鬆坐穩A股首富寶座，但其實佢持股市值損失高達109億元。
自二○一○年起，梁穩根個人財富連續三年大縮水。截到今年十二月六日，梁穩根直接和間接持有嘅4家上市公司，包括三一重工、廈工股份、北化股份、安泰集團，股權總市值有239.08億元，比年初少咗大拿拿109.53億元，仲要係一眾A股富豪之中，損失得最甘嗰位，認真慘情。
除咗榜首嘅梁穩根，穩佔第二、三位嘅復星董事長郭廣昌、蘇寧集團董事長張近東都唔好得幾多。近日A股靈魂返咗嚟，睇吓月底個數可以升番幾多！除咗呢啲例牌富豪之外，今年都見到一啲富豪新星，好似東風股份嘅黃氏家族、百隆東方嘅楊衞國，佢哋係因為企業嘅獨特性，因而有競爭優勢而躋身富豪行列。
余絲韻