絲絲講場：張華峰立會開聲救經紀
成交淡靜，細經紀無啖好食，代表業界嘅立法會議員張華峰，今日就喺立法會初試啼聲，第一次提動議幫小經紀出頭，要求政府要有具體措施支持本地證券業發展。今次張華峰喺議會度力撐小經紀，八大證券團體嘅代表今日將會分上、下午兩場，「車輪轉」咁到立法會聲援張華峰。啲經紀咁齊心，反映佢哋嘅經營環境真係水深火熱！
業界輪流踩場聲援
證券及期貨從業員工會會長林德明話今日上晝十點，佢哋就會到立法會示威區遞交支持動議嘅函件，雖然上晝十點係開緊市，但佢哋都呼籲業界同會員盡量到現場聲援。絲絲記得，佢哋以前都發動過反對港股加時遊行，有成幾百人參與，真係唔好低估佢哋嘅動員能力。
到下晝收市後四點九，七大證券團體代表亦會到立法會遞信，證券學會會長李細燕話唔知到時會有幾多人到場聲援，但佢已叫齊所有會嘅代表到場。
小經紀依家嘅經營情況可以用「屋漏兼逢連夜雨」形容，市況差已搵得雞碎咁多，仲要監管條例多到攞命，一時又話加時，一時又話要提升系統，樣樣都係錢，經紀行蝕本、停業已聽到麻木，佢哋同政府、監管機構反映多次都係冇乜結果，惟有希望通過立法會提出動議，向政府施壓。