出年「兩會」開幕嗰日有人會喺北京長安街裸跑？唔好以為冇可能，只要內地樓價一路升，北京市民就會有幸目睹呢個「壯舉」。
事關近日內地經濟學者郭建波，向一直唱好樓市嘅華遠地產董事長任志強發戰書，預言一線樓市價格好快會全面下跌，如果出年三月樓價仲升，佢會喺「兩會」開幕嗰日喺北京長安街裸跑十公里，如果樓價下跌，就要任總為自己唱好嘅言論喺媒體上公開道歉。
不過有地產界大炮之稱嘅任志強今次非常淡定，一路都冇就單嘢開過聲，佢秘書好直接咁話，微博上每日有幾萬條訊息「@任總」，如果佢冇做評論或者轉發，只可以話佢對呢樣嘢完全冇興趣。
反而係身為佢好友嘅SOHO中國董事長潘石屹，尋日喺微博上提任總，一定要「沉住氣，千祈唔好回應」，即時畀網友話，唔知佢咁講，到底係唔睇好任總會贏，定係採取激將法，為賭局推波助瀾呢？