絲絲講場：鄭明訓：歡迎邢生返思捷

新管理層表現需時

邢李(火原)透過掃入思捷供股權，持有思捷一成股權，呢吓回朝，搞到各界對佢嘅舉動仍然好關注，鄭明訓一早「閂閘」話唔講思捷嘢，又話對於邢生嘅供股「No Comment」咁！但一講番思捷個品牌，佢就多啲嘢講，佢話時裝品牌價值需要時間建立，而且公司新管理層啱啱上任，大家要畀一至兩年時間佢去表現。

幫時裝社企搞慈善

查實佢都好落力幫思捷搞新意思，佢尋日明明係幫一個做時裝嘅社企做宣傳，最終都話將來會介紹思捷管理層嚟參觀，希望兩者日後會有合作。

呢間叫L plus H Fashion嘅社企，產品全部香港製造，兼且請咗唔少老一輩嘅「工廠妹」幫手，依家佢哋就搞緊個毛衣捐贈活動，有成幾千件衫送畀唔同團體，當中鄭生就係贊助人之一喇。

鄭生話自己後生時都吃過苦，依家就生活得自由，所以時不時諗吓點樣去幫助社會上有需要嘅人。佢本身已經有個獎學金畀啲大學生出國見識，經介紹之下就認識咗L plus H Fashion，覺得企業唔好淨係為賺錢，亦要為社會做多啲事，佢除咗自己出錢之外，仲出埋力叫啲商界朋友幫幫手添。

余詩韻