銀行呢兩、三年，經常打電話嚟叫筆者借錢，而借錢亦由低息貸款轉為利用信用卡個信用額去套現。又係喎，信用卡一早已經成為香港人嘅生活必需品，大部分學生已經擁有唔止一張信用卡，好彩筆者嘅學生都有基本理財概念，知道信用卡係唔可以亂碌，如果唔係，後果可以好嚴重，所以消費者要認清有咩陷阱，咁先可以避免墮入。
雖然信用卡普及，但其實仲有好多消費者對佢哋收費同利息計算方式仍存在認知不足。加上各發卡銀行都有唔同收費準則，容易令人墮入收費陷阱。所以金管局擬借鑑英、美等國，研究改善本港信用卡營運，將信用卡利率同收費等規範標準化。
頭先講過銀行好歡迎你利用個信用額來提取現金（即係現金透支），不斷同你講手續費好平、利息好抵。雖然手續費低，但魔鬼在細節，持卡人使用提取現金服務時，總體費用亦隨之走高。所以銀行放寬信用卡提取現金業務，對持卡人來講係一個「糖衣陷阱」，持卡人應謹慎對待。
信用卡一般設免息還款期，如卡主未能按時還清卡數，銀行先會向客戶收取一筆逾期罰款。除罰款，銀行仲會就簽帳消費同現金透支收取利息，實際年利率高唔在講，銀行仲有權調高利息添。最「甘」嘅係所有結欠即時計息「起釘」，包括已開始嘅分期付款、自動轉帳同八達通自動增值等款項，通通一齊計息。倘若卡主經常只付最低還款額，並不斷再簽帳，利疊利之下，負債就會愈來愈大，所以千祈唔好只還最低還款額又繼續碌卡喇。
銀行不時與商戶合作推出購物優惠，為少少甜頭，消費者可能會帶動周邊朋友一齊用佢張卡消費。好多時朋友畀返錢你，但又沒有立即入返去信用卡戶口，結果連朋友嗰份都唔覺意用埋。相信有不少人於收到「震撼」月結單，先發覺結欠較預期高而出現周轉困難。
現時很多發卡銀行以免年費、迎新禮物吸客，消費者要留意豁免年費可能設有期限。當優惠期一過，銀行就會向客戶收返年費；有部分銀行都可以畀客戶於指定時間內「碌卡」達指定金額，再獲得豁免年費。但如卡主出卡後，將佢束之高閣，又唔留意月結單，銀行就會自動過數收取年費，所以唔好申請太多信用卡。
香港大學電子金融服務榮譽助理教授 徐燦傑