孖妹S檔案：識得攀崖唔使再捱

陳：Chartwell Capital創辦人兼投資總監陳惠仁

高妹：你喺美國讀書，平時睇美股多過睇港股，其實美國呢個財政懸崖係咪真係有咁恐怖？

黃元山

放大圖片

陳：呢個只係「恐嚇性」字眼，當然財政懸崖嘅破壞力好大，因為任何美國人都唔想見到，所以其發生機會率好低，最終民主、共和兩黨一定會互相妥協，解決問題。老實說，財政懸崖係市場早知嘅事情，在美國總統大選前已經出現，點解選完先變成市場焦點呢？足見市場需要藉口去提供炒作機會。

慎防熱錢來去如風

高妹：作為基金經理，年底之前你嘅投資策略係咩？

陳：我堅信價值投資法則，但並不是叫你買入一隻股票後，然後持貨十年，因為價值是需要在特定框架之下才可真正體現。明顯地，中國股票係需要適時調校配置比例，因為中國股市歷史唔夠美股長，不少股票仍未經歷過大風大浪，令價格波動性較敏感。某程度而言，當一隻中國股票升幅達到30%以上，其價值吸引力便逐漸下降，投資者需要考慮沽貨獲利。

高妹：但近期熱錢湧住來港，港股應該仲有得上，現時買定啲股票等市升，未必係壞事。

陳：香港係自由市場，熱錢可來也可去，股市可升亦可跌。我認為投資者入市時，要細心分辨「價錢」和「價值」之間嘅關係，股價「抵」並不代表價值「高」。投資世界今時不同往日，政治氣候、政策變化、遊行示威、疾病等等，均可影響環球股市，並非基本數據或計算可以預測將來。

高妹：不過財政懸崖造就市況波動，波動即係有得升跌囉！

陳：基金經理就好似調酒師一樣，適時適當去調節投資組合股份持貨比例，即「酒濃要加水」、「水淡要加酒」，即係要平衡整個投資組合風險，而非依賴某隻股票去提升回報。 其實投資嘅最終目標就係「財富增值」，普通散戶係唔需要睇太多股票，專心睇一至兩隻心水股，每年保持平均賺10%至20%回報已足夠，如果你能夠將此投資成績持續三十年，你仲唔係股神？

黃：中大全球政經碩士課程客席講師黃元山

彩兒：你喺投行打滾咁多年，成日面對環球經濟大小風險，今次你點睇財政懸崖先？

黃：好明顯財政懸崖只係個政治化妝術語，大家將其爆炸後嘅威力想得太嚴重。照牌面去分析，兩黨根本沒有一拍兩散嘅本錢，政治需要妥協，我相信兩黨會「死雞撐飯蓋」至最後一分鐘先會達成協議。不過，政治充滿無限變數，喺呢段時間內，環球股市一定會變得敏感而且波動。

準確測市難於登天

彩兒：連你都傾向相信財政懸崖唔會爆煲，咁港股後市真係升多過跌喎！

黃：股市升跌包含多種因素，財政懸崖只係其中一個影響股市方向嘅觸發點。股神巴菲特講過：「我從來無見過能夠預測股市升跌嘅人。」既然連股神都唔敢自認有能力去預測市況，捕捉入市時機，咁散戶又憑甚麼能力去估市呢？我明白散戶當然想在市場上，做到低買高沽，本小利大，但近期市況受外圍因素影響而異常波動，人類係有感情嘅動物，會貪婪亦會恐懼，如果盲目去估市，胡亂入市買賣，我擔心大家會好容易由低買高沽變成高買低沽！

彩兒：吓！咁散戶要賺取投資回報，最好嘅方法係咩呀？

黃：根據David Swensen嘅學術理論引述，有超過九成嘅投資正回報都係取決於資產配置（Asset Allocation），即係講緊如何控制回報與風險之間嘅波動性。當然，散戶可以對市場有升跌看法，亦可做功課去揀股，但很大程度上，最有效賺取合理回報嘅投資方法就係資產配置。我相信，只要投資者能夠將投資組合內「股、債、商品、現金」嘅比例做到平衡分配，就算在波動市況中一樣可以有錢賺。

雷：科技大學經濟學系主任雷鼎鳴

政治問題 唔難傾掂數

高妹： 美股受財政懸崖困擾，拖累港股連跌幾天，散戶都聞「崖」色變拋貨。難怪外圍有不少舉足輕重人士發表驚人言論（見表），一於出口術希望遏止「崖崩」。科技大學經濟學系主任雷鼎鳴對「如何攀越懸崖」亦有些意見。

　雷： 呢個係政治爭拗，總之未到死線最後一刻，兩黨都會口硬，盡量討價還價。不過，政治一日都嫌長，但我估兩黨唔會蠢過隻豬嘅，最後一定會傾掂數，唔畀財政懸崖崩潰，否則之後美國經濟都幾大鑊，奧巴馬亦會一身蟻。

彩兒： 連雷教授都咁講，我都放心啲！

　雷： 其實我一向都唔太擔心美國，反而歐債問題先至難搞呀！美國至少都有人才、有科技，就算美國人點消費，佢哋都有生產力；但係歐洲人真係懶好多o架，你見當地示威永無休止咁，就知要歐洲人接受財政緊縮係非常辛苦嘅事喇！

高妹、彩兒

若有料報畀高妹同彩兒或有嘢問，可電郵money.biz@opg.com.hk