證監會主席唐家成、金管局總裁陳德霖同證監會非執行董事李金鴻，三個喺金融市場影響力舉足輕重嘅人物，表面上無乜關連，但絲絲八到，原來三人竟然係同年同月同日出世，五十八年前嘅尋日，即係一九五四年十月三十日，就係三人出世嘅日子，真係中六合彩都冇咁巧！
講起十月出世嘅金融界猛人，除咗上述三人外，港交所前行政總裁周文耀都係十月生日。睇嚟，十月出世都好旺金融界名人呢！
講番「壽星公」之一嘅唐家成，佢剛剛上任證監會主席，應該會好忙，但夜晚都會抽空同家人出外食飯慶祝58歲生日！唐家成嘅喜事又點只一樁，聽聞佢好快第一次做外公，佢位千金將於十二月初生BB。咁佢想要孫女定孫仔呢？答案係佢唔知，總之無論孫仔定孫女，佢都一樣咁高興啦！