絲絲講場：影子CEO跟貼馮婉眉

要做CEO固然困難，但係即使有機會畀你試吓做滙豐香港區總裁馮婉眉（Anita）嘅「影子CEO」，亦一啲都唔容易，因為你先要經過比賽，過關斬將後，先至有機會跟Anita學習點做一兩日「影子CEO」，親身體會吓獅子銀行咁樣巨型嘅跨國機構係點樣管理嘅！

Anita同絲絲講，有五位學生跟住佢學做CEO，其實佢哋來頭都唔小，五人分別係來自聖保羅男女中學同沙田學院，而且個個都係得獎嘅學生，之咪係拎咗由滙豐主辦嘅「滙豐少年財務策劃師大賽」同贊助嘅「JA學生營商體驗計劃」囉！

「影子CEO」係一連兩日「滙豐體驗計劃」中嘅一項活動，除咗可以跟住Anita做嘢，五位學生仲去咗唔同部門參觀，包括零售銀行同財富管理業務。第二日就去埋滙豐將軍澳資訊科技數據中心添！

絲絲自小就夢想做CEO，真係羨慕呢五位同學，可以化身「影子CEO」過吓癮，而同學們同絲絲講，過程中最大嘅得着係有機會同滙豐管理層、部門主管交流，聽吓佢哋嘅經驗，對未來嘅人生同事業發展都有好大幫助咁話！

余詩韻