Market Insight：港華燃氣 蓄勢破位

美國人向來重視萬聖節，每屆選舉咁啱喺「西洋鬼節」前夕，咁啱得咁蹺，每次那一位候選人面具好賣，都可以順利進駐白官。兩個賣扮鬼扮馬萬聖節服飾的美國零售商──Buycostumes.com及Spirit Halloween，早前公布的面具指數都以奧巴馬佔先，集天時地利人和之下，睇怕奧巴馬應該可以順利做多四年，聯儲局主席伯南克亦唔使急住搵份新工。

無市還無市，不能不提美國公司，第三季業績期剛過了一半，因為iPhone，個個淨係聚焦蘋果公司點衰點衰，股價由高位705美元累跌超過一百蚊，去到603美元。

放大圖片

放大圖片

聯儲局泵水見成效

但睇番統計數字，標普500指數裏面，有272間公司交出成績表，每股盈利、營業額，又或者兩個數優於大市估計的，分別佔51%、35%及25%，平均每股盈利幾乎同第二季睇齊，和早前古勝提到，大行估緊第三季，美國上市公司會出現三年來首次季度業績倒退看來落空。

經聯儲局三輪泵水，看來美國經濟及企業盈利展望，原來比大部分賓架估計的理想，唔少人估緊今次美國風暴，會令建築物及基建設施復修，可以輕微推高第四季GDP，睇嚟淡友要出手，要再搵第二個藉口。

昨日期指結算日，港股靜過鬼，主板成交460億元是十個交易日以來最低，恒指跌82點收報21,428點，上次出現三個交易日連跌已是兩個月前，沽空佔大市成交比例重返一成樓上見10.53%，是九月二十七日以來最多，淡友蠢蠢欲動，但偏淡成交可見，等買貨仲係比等沽貨套現的人多，整固後大市仲有條件再升。

渣打料可跑贏滙控

比亞迪（01211）第三季業績大跌九成四至461萬元人民幣，即使盈警後市場有晒心理準備，股價昨日仍要跌4%收報15.06元，綜觀大行普遍對中期展望負面，一來太陽能投資短期情況逆轉機會唔大，今年估計要蝕8億元人民幣左右，其次係主打的多用途車S6，竟出現按季8.8%銷售下跌，在黑暗的盡頭等了又等，揸家已經開始失去耐性。

反而昨日渣打集團（02888）份中期管理層報告，唔少數據幾標青，包括收入維持高單位數增長，意味第三季未被歐洲影響，另外計埋3.4億美元畀紐約州金融局一次過的庭外和解支出，成本與收入比例仲大致持平，盈利則維持雙位數增長，現價一三年市盈率10.1倍，在下個人觀感，渣打業務表現尤勝滙控（00005），股價仲未重返52周高位204元，捧場客繼續跟進吧。

以為二三線股調整，唔多唔少拖埋幾隻至愛的燃氣股落水，等機會執平貨，點知燃氣股抗拒地心吸力能力特強，港華燃氣（01083）月中見過上市新高6.25元後，最多回到6.03元，昨日百多萬股成交，彈番上6.13元收市，幾乎無跌過。

古勝不止一次提過，「十二五」規劃明言支持全國管道燃氣發展，冀一五年能夠達成全國2,300萬億立方米的燃氣消費量，傾斜的國策，燃氣股成為中資板塊之中，幾乎肯定保持高增長的股份。

燃氣股確保高增長

港燃上半年賺3.57億元增長18.1%，收入24.37億元，來自燃氣銷售及接駁費用，分別佔19.29及5.08億元，增長20.8%及50%。去年底有68個供氣項目，今年預告以10億元增加大約10個新項目，新取得四個分別位於遼寧、山東及江西，捧場客關注是年底前能否趕及多簽幾個以達標。港燃一三年PE15.6倍，稍低於新奧能源（02688），上半年售氣增長因為工業燃氣銷量減慢，第四季開始應有改善，6.1元左右應可放心入市。

古勝