樓市水漲船高，有部分業主都先行止賺，沽咗樓揸現金，但想再上番車，又擔心現階段嘅樓價屬高位橫行，論收租回報都只係4厘息左右。呢類型資金既想要有較高息回報，而風險又想要喺可控制範圍內，正正造就咗機會畀好多公司喺市場上發債吸走呢筆資金。
近期發債最頻繁梗係要數內房股啦，因為長期受中央政府嘅宏觀調控，好多內房嘅流動現金開始有緊張嘅迹象。發債籌集資金係一個好老正嘅決定，尤其現時銀行嘅低息環境令資金傾向高息債券。過去1個月，先後共有4間內房股發行高息優先票據，抽走近百億港元。
自從QE3推出，成個月內房債券成交價上升，到期息率（yield to maturity）趨跌、息差收窄，反映內房高息債券非常之受大家歡迎。部分債券買賣差價更低於票面息率（coupon rate），正正話你知投資者明知收緊嘅利息低於發行嘅票面值，都以溢價買入相關票據，可見內房高息票據嘅受歡迎程度可以用「瘋搶」來形容。
雖然內房高息債券備受追捧，但部分原因都係同資金推波助瀾有關。依家只係反映信貸市場預期內地宏觀經濟同房地產中線維持穩定、前景漸見明朗。
不過，Prof. J溫馨提示：內房盈利表現唔係由市場基本因素推動，選擇內房債券時應注重公司嘅個別因素，唔好只係比較息率面上高低。話就話債券一般風險較低，但如果公司因估你唔到嘅破產而無法贖回，投資者依然會贏粒糖、輸間廠……繼續追蹤，出發！
香港大學電子金融服務榮譽助理教授 徐燦傑