秋高氣爽，踩單車係假日消閒好活動，法興就揀啱季節，喺上星期六日搞咗個單車慈善行，畀機會員工做運動之餘，又做吓善事。
法興之前喺巴黎同倫敦舉辦過同類活動，慈善行喺歐洲唔算新鮮事，不過「踩」入亞洲就只係第三次，仲去親都係靚風景區，包括北京長城及柬埔寨吳哥窟，今次喺兩日內由台中踩去日月潭，全程約一百一十公里，一百一十個參加者當中，香港員工佔成六十個，法興證券環球股票產品董事李錦（Edmond）就係其中之一。
Edmond話細細個就學踩單車，平時好享受單車家庭樂，今次去台灣前就孖住屋企人、同事進行咗差唔多十次特訓，好處係踩慣咗之後pat pat唔覺痛！
其實佢睇住慈善行「長大」，以前幫公司做社會企業慈善大使時仲有份幫手搞，年年都係忠實粉絲。佢仲話除咗做善事外，活動可以增加同事間了解，今年預算籌一百萬元以上，捐畀防止濫藥嘅國際機構D.A.R.E International、以及本港安徒生會，增加低下階層小朋友睇書嘅興趣。