長和系主席李嘉誠向來都對創新科技情有獨鍾，據電訊科技媒體Techcrunch報道，誠哥旗下嘅創投基金Horizon Ventures繼早前入股以色列一個女士化妝網Preen.me後又有新動作，今次就牽頭投資電腦防毒公司Shine Security，涉資達330萬美元（約2,574萬港元）。畀得誠哥睇中，Shine究竟有咩來頭？
原來Shine號稱開發出新世代防毒技術，能夠偵察到手機或者電腦有乜嘢最微細嘅唔正常，足以對付與Stuxnet同級嘅攻擊程式。唔講唔知，呢隻Stuxnet就係早前引起軒然大波，被發現用嚟攻擊伊朗核設施嘅超級病毒，被指係由美國同埋以色列政府共同開發。唔通誠哥覺得將來互聯網會病毒氾濫，所以買定防毒技術融入自己嘅電訊王國？
Shine初期只會開發應用於Android系統嘅防毒程式，至於幾時可以用埋喺iOS上，作為投資人之一嘅Initial Capital暫時亦都畀唔到個具體時間。