前幾日吉利汽車（00175）揸住兩成股權嘅英國錳銅控股，即係倫敦黑色的士（black cab）嘅始祖，因為欠債纍纍而宣布破產，咁啱市場又傳話福特可能會將英國嘅貨車生產工廠摺埋，喺汽車業咁不景氣嘅時候，比亞迪（01211）就同英國出租車服務公司greentomatocars合作，出年供應50部全電動出租車，咁蹺又係去倫敦，真係唔知話佢攞景定贈興好喇。
比亞迪將會供應50架e6全電動車畀greentomatocars，出年第二季正式投入服務，而呢批電動車更加係倫敦首批全電動出租車，絲絲睇番比亞迪個官網，e6型號單次充電後可行駛差唔多300公里（但係喺唔開冷氣嘅情況下），最高車速達每小時140公里以上。
不過，絲絲猶記得今年五月，深圳就有宗車禍引致三人死亡，咪就係比亞迪架e6出咗事，最後個調查報告係話電動車電池受擠壓短路而起火，並唔係電池爆炸喎，亦話事故唔涉及電動車安全質量問題喎，咁都安心啲，但呢款電動車嘅電池問題日後點算，就好似未有交代喎！