近年唔少國企金融機構都非常積極想向外擴充業務，佢哋都嚟咗香港成立子公司，仲吸納咗唔少人才添！絲絲就知道港大電子金融服務榮譽助理教授徐燦傑啱啱都轉咗新工，成為中國銀河國際嘅財富管理主管。
徐燦傑同絲絲講，新公司向佢招手之後，雙方都用咗九個月時間傾吓公司未來發展嘅方向；傾落又發覺大家嘅理念相似，所以徐燦傑至決定「復出」，重投股票市場，正式加入中國銀河國際。
徐燦傑仲話，搵工其實就好似搵一個平台實現自己嘅理念，情況就係同公司合作「做一個project」咁；而新公司又願意畀空間佢放手咁去做，所以大家就一拍即合喇。
徐燦傑依家係中國銀河國際嘅負責人，主要負責公司嘅日常管理工作，以及產品優化。絲絲問佢未來有咩大計啦，佢就話出年會幫母公司中國銀河證券，喺香港同上海搞A+H股上市。
雖然新工好忙，但佢都好識放鬆自己o架，之後佢就會喺電台開咪，透過大氣電波同大家講下音樂同經濟嘅關係。絲絲就祝徐燦傑可以喺新公司大展拳腳，實現自己嘅理念。