港交所（00388）斥巨資喺將軍澳起嘅新數據中心，將會敲定喺下個禮拜一（廿九日）將證券市場有關系統遷入同正式投入服務。其實早喺幾個星期前，港交所過百名員工（主要係資訊技術方面）已率先做「開荒牛」，遷入新大樓返工。
咁員工由多姿多采嘅中環搬入將軍澳，會唔會好悶呢？絲絲八到，新數據中心設備一流兼且多元化，更設有休息中心，裏面有按摩椅、健身室、電視、乒乓球枱等，真係非常窩心，相信員工喺數據中心返工都唔會投訴！
數據中心更設有一個夠二百人用嘅飯堂，有港交所員工笑言，喺中環食飯貴人所共知，依家喺數據中心返工，可以喺canteen食飯，又冇得行街買嘢使錢，年終慳番唔少，仲可以儲錢添。
新數據中心話晒係亞太區數一數二，保安超嚴密，進入數據中心，除咗需要指定卡外，仲要指定指紋至可進入；而且仲要經過設置的多道門至可進入，以策安全。放置設備信託管理服務機器嘅地方，更一定要除鞋至入得。保安之嚴密，唔講絲絲差啲仲以為自己睇緊戲！
唔講唔知，數據中心飯堂啲枱下面仲裝有電線設備，萬一港交所喺中環嘅大本營有個別部門出咗事，可以即時撤退，搬入數據中心作臨時辦公室。
一如港交所其他大型項目，新數據中心下個禮拜一正式投入服務後，會設有兩個星期穩定期，期間若發生緊急事故，可轉回至數據後備中心。
余詩韻