孖妹S檔案：炒殼瘋潮逐次數

「80後」教你避開「殼股」地雷陣

聽完郭Sir嘅「那些年」，孖妹去搵金融界另一位激似「阿Sir」嘅「80後」基金經理，唔好睇佢一身黑黑實實呀，佢做分析好細心o架，對「殼股」仲一清二楚添！皆因舊時佢管理基金，已經有投資「殼股」經驗，如保利置業（00119）、中國海外宏洋（00081）咁，不過賺咗幾多「殼股」錢係市場機密，所以唔方便透露了！

文：國泰君安紅利股票基金基金經理 文志豪

如何尋找「殼股」蛛絲馬迹

逃生「殼股」的注意事項

高妹：初出茅廬嘅散戶，投資態度難免心高氣傲，想借住炒「殼股」而賺快錢。不過，食飯要知米貴，炒「殼股」都要知個「殼」字點解o架？否則隨時輸到你一「殼」眼淚呀！

文：「殼股」變身大多數係因為大股東認為，其公司自身業務發展空間不大，所以願意套現離場，將擁有上市地位嘅公司賣給新主，再變身成另一間公司。所謂炒「殼股」，其實散戶可以憧憬以下兩件事出現，第一件事發生在易主之前，即憧憬公司將被收購，因為當公司大股東賣股時，只要新主購入之股份超過股本三成，便要提出全面收購要約，換句話說當大股東賣出好價錢，小股東亦能以溢價賣畀新主。

第二件事一般發生在資產注入嘅時候，當新主把業務注入上市公司時，一方面改變公司原有業務，同時亦在改變公司價值，即係話公司嘅業務性質將在「變身前」和「變身後」有所不同，而注入上市公司嘅資產質量，以及為新業務所付出之代價，同樣是帶動股價升跌嘅催化劑。

想知道「殼股」嘅風波史，就梗係要搵個「講股佬」喇！而耀才證券市務總監郭思治（郭Sir）投身本港金融市場超過三十年，連佢都話：「聽殼股古仔嘅人有好多，但真係身歷其境嘅人就好少，所以你哋嚟搵我問嘢，就真係搵啱人喇！」

佳寧投資：最轟動一時「殼股」

郭Sir講古（股）

「七九年，由新加坡來港嘅土木工程師陳松青一手創立佳寧集團，為咗進軍地產市場，以每股6蚊收購當年股價僅為1蚊嘅上市公司美漢，成功借殼上市，並改名為佳寧投資；去到八○年，佳寧用名下另一間公司，以近十億元購入金門大廈，半年後再轉手淨賺六億八千萬元，由於業務迅速膨脹，刺激股價一度升至每股17.9元嘅歷史高位，令一班股民狂炒得如癡如醉。」

「當年有分析員就話，如果長實（00001）係三點鐘嘅太陽，咁佳寧就係八點鐘嘅太陽，可見不少專業人士對呢隻股票均持正面睇法。但八二年前後，中英就香港前途問題進行談判，港經濟前景變得不明朗化，樓價大跌，各行各業均受到衝擊，及後佳寧高層亦被爆出詐騙事件，股價開始下瀉，加上資金周轉不靈，最後佳寧股票喺八三年一月三日停牌。如果我無記錯，其股價停牌前只係跌剩0.66元，名副其實股票變牆紙。」

電訊盈科：最傷亡慘重「殼股」

「投資殼股真係富貴險中求o架，所以控制風險十分重要。記得九九年李澤楷成功借殼股票代號為1186嘅得信佳上市，並改名為盈科數碼動力，股價開始扶搖直上，同年十二月二十八日，該股曾升22%報19.5元，市值超過1,700億元，成為全港第七大上市公司。其後佢更通過財技鯨吞香港電訊，並改名電訊盈科，加上當時正值科網股熱，終令股價喺二○○○年二月十五日高見28蚊收市，令不少散戶為之瘋狂。」

「但點解我話電盈對散戶嘅殺傷力最強呢？因為當年香港電訊都算係老牌公用股，其利息不俗而且可靠性高，不少老人家都有持貨在手當退休股收息。但由於李澤楷係以巨額借貸去收購該股，搞到○一年嘅虧損高達69億元，變成負資產公司。最陰功就梗係啲老股東，其後科網股爆破，電盈股價急挫，○三年股價比○○年高峰期下跌達96%。○八年六月更被剔出藍籌股行列添！」

中信泰富：最大跌眼鏡「殼股」

「有啲人借殼上市係搞搞震，但有啲人就真係正正經經想做實業。九十年代初，當時名字叫中信（香港）嘅公司購入上市公司泰富發展49%權益，以及港龍航空38.3%權益，並於九一年易名為中信泰富（00267），其後業務愈來愈廣泛，涉獵航空、基礎建設、發電、電訊等範疇，股價亦穩步上揚。老實講，我一直覺得中信泰富嘅投資成績驕人，前景亦一片光明。如果○八年佢無沾手類似Accumulator（累計股票期權）的槓桿外匯買賣合約，搞到公司蝕成150億元，令股價一沉百踩，我相信今天其股價一定會更好，只能說呢隻股票好可惜囉！」

一般「殼股」變身過程

彩兒：即係炒「殼股」要睇住兩大時機喇，就係「變身前」或「變身後」。不過時機嘅嘢真係「天知、地知、散戶唔知」o架喎！

文：所以散戶要分析「殼股」難度好高，加上呢啲公司「變身前」嘅股票流動性一般比較差，令投資期長短變得無法估計，如果你係特別要求資金流動性較佳嘅散戶，咁我就唔建議去炒「殼股」喇。

如果你想在市場尋找一些可能賣殼嘅公司，咁就要從市值、公司股權、既有業務範疇、營運情況方面入手了解，或者真係畀你搵到個「潛力殼」出嚟都唔奇！

第一步：購入上市公司大股東股份

第二步：提出全面收購

第三步：更換董事局管理層

第四步：注入新業務及剝離舊業務

如何尋找「殼股」蛛絲馬迹

高妹：炒「殼股」根本就係守株待兔嘅投資行為，一日等唔到有心人去買殼，啲錢同擺喺零息銀行無咩分別。如果散戶真係揀錯「殼股」，究竟有咩逃生路線可走？

文：如果散戶係買錯「殼股」嘅對象，吃虧嘅係買錯咗一盤生意並不划算嘅股票，也可以是資金被鎖在流動性唔高嘅股票，若套用機會成本去講，即係犧牲咗購買另一隻股票嘅選擇權；但如果散戶買咗隻變身「殼股」，基本上就只有「撤」，即早走早着。至於點樣可以比人走得快？咁就要睇清楚上市公司嘅公布，繼而判定其價值了。

（高妹）（彩兒）

若有料報畀高妹同彩兒或有嘢問，

可電郵money.biz@opg.com.hk