香港人崇尚work hard play hard，聽到萬事達卡嘅調查結果，一啲都唔驚訝，呢個有關亞洲人外遊意向嘅調查，發現原來香港人係最鍾意去旅行嘅亞洲人。
暑假啱啱先完，唔少熱愛外遊嘅香港人都意猶未盡，已經度緊下年嘅目的地，鍾意「捐窿捐罅」嘅絲絲當然都唔例外喇！
調查喺今年四至六月進行，喺亞太區14個市場，訪問咗6,904個消費者，本港受訪者中，有超過八成話喺未來一年，計劃外遊散心嘅次數比上年多，喺亞太區排第二位，僅次於內地人，而計劃公幹外遊次數較上年多嘅香港人，佔整體都有66%o架。
香港人咁「坐唔定」，唔怪之得喺過去十二個月，無論係離港工作定係觀光，香港人嘅外遊里數都係冠絕亞太區o架！為咗去多幾次旅行，香港人貫徹「精打細算」嘅精神，有五分一人話會買廉價機票，更加有超過一半話會住中價酒店，至於嚟緊一年，香港人最想去嘅目的地，就包括咗內地、台灣、日本、南韓同新加坡，咦？都係香港嘅「隔籬鄰舍」，唔通貪方便？