上市公司拆夥形式多不勝數，但最耐人尋味嘅可以話係夫妻檔，早前雅天妮（00789）創辦人謝超群同公司失去聯絡，迅速由老婆葉英琴接掌，已經令全城嘩然。今次就輪到手袋股米蘭站（01150）主席姚君達爆出離婚消息，投資者當然想知道姚君達會點樣分身家啦。
但公關老友同絲絲講，查實姚老闆同妻子李麗紅屬於再見亦是朋友嗰隻，叫做和平分手，兼且兩人關係至今仍相當良好，所以唔使太擔心米蘭站有咩股權問題咁話。雖然公司年報寫住，李麗紅因配偶身份，同姚君達共同持有米蘭站72.29%權益，但係呢啲股權其實係由姚老闆全資實益擁有嘅唯美企業持有，所以李麗紅個人持有嘅米蘭站股份，只係有52.8萬股，佔已發行股本0.08%。米蘭站個股價，尋日跌咗1.6%，應該同離婚消息無關。
若果姚老闆同李麗紅分身家，絲絲嘅律師朋友都話，未必需要郁到上市公司嗰份，姚老闆最多以同等市價嘅資產或現金交換都得。
之但係，計贍養費就好高難度，要考慮好多因素，姚老闆身家豐厚，坐擁大把值錢嘅「磚頭」，要計嘅話，真係一匹布咁長，不過，難得呢對夫妻嘅關係咁友好，應該唔會搞到好麻煩嘅。