咁多銀行服務瓣數之中，好多人都話最有潛質係私人銀行，所以好多主要金融城市，都大力發展。香港財務策劃師學會就睇中呢一點，早前第一次搞「中國高端客戶理財策劃專業證書課程」，發覺真係需求好大，依家要添食。
香港財務策劃師學會主席龐寶林話，呢個係全港首個符合應考認證私人銀行家（Certified Private Banker，簡稱CPB）「教育」要求嘅認可課程，所以好多從事保險業、獨立理財顧問及銀行業為主嘅人士報讀。據講依家內地得380名合資格從業員擁有CPB資格認證。
龐寶林話，反應咁好，所以好快就決定再開班，北京當代金融培訓高級顧問暨廣東金融學院國際CFP專案中心執行主任古致平，透露咗一個數字，大概可以解釋到點解針對內地人士嘅私人銀行服務咁吃香，佢話，由○八年至一一年期間，內地高淨值人群持有嘅總財富達18萬億人民幣，比去年同期上升18個百分點。其中，廣東、上海、北京、浙江同江蘇嘅高淨值人數同升幅就名列全國前五位。
以往需要私人銀行服務嘅富戶，最希望創造財富，同追求高品質生活，依家需求仲多啲，包括財富安全、財富傳承、子女教育同企業未來發展等。