絲絲講場：滙豐短訊Call客埋櫃枱

銀行櫃枱服務，喺呢幾十年都變咗好多，目的只有一個，就係唔想啲客用太多時間等，有啲銀行仲作出服務承諾，講明排隊時間唔多過幾多分鐘。最新發展就係利用科技——用手機短訊call番你，返去銀行分行辦理服務手續。

絲絲早前去某銀行，已經見到佢哋用撳飛仔，坐埋一邊等叫冧巴，唔使企喺度排隊咁攰，絲絲已經覺得好過以前好多，點知尋日滙豐有改良版。

滙豐香港區零售銀行及財富管理業務主管施穎茵，尋日好雀躍咁話畀絲絲聽，已經推出「櫃位服務短訊提示」，客戶喺遇着人多嘅時候，攞咗輪候編號之後，可以選擇留低手機號碼，然後善用時間做其他嘢；當即將有櫃位服務嘅時候，客戶就會收到銀行發出嘅短訊，提醒佢返銀行辦理服務。

呢項咁體貼嘅服務，雖然唔少餐廳、醫務所已經用緊，銀行就係首創，但暫時只可以喺滙豐旗下五間卓越理財中心用到。

施穎茵話，揀呢幾間，係因為呢幾間分行嘅人流比較多。絲絲希望遲啲可以喺其他分行，享受到相同服務，時間即係金錢嘛！

不過，絲絲覺得呢個服務有啲尷尬，如果好快call你，呢段時間做唔到啲乜，但如果你可以行開做其他嘢，即係等咗好耐啦，咁你寧願快啲，定係慢啲至call你？

余詩韻