證監會嘅保薦人監管諮詢仲未有結果，金占士個人都反對向保薦人施加刑責，但係喺呢行咁耐，真係聽到好多保薦人嘅烏龍嘢，有啲真係好離譜，確實又係爭唔落，例如有間中資投行犯咗低級錯誤，搞到畀監管機構列入關注名單。
呢間中資銀行背景嘅投行規模都屬二線，但係表現認真麻麻，舊年十二月趕尾班車保咗兩隻新股之後，到依家都只係搭單做吓帳簿管理同經辦人，無再做過保薦人，金占士聽到關於呢間行嘅戇居嘢，唔知關唔關事。
話說間行之前保薦間公司，過埋上市聆訊，一切順利，點知到bulk print（批量印刷）嘅時候先至發現，上市文件入面嘅帳目錯咗幣值，立即叫停Printer，之後要重新遞交過文件。行內人都知，bulk print即係上市公司做好業績報告、新股上市文件獲批，核數師同保薦人確認100%正確，然後拎去正式大量印行派發畀股東同公眾，由於印業績報告或年報，特別係幾百頁嘅招股書，一印就以百萬元計，錯咗真係好大鑊。
雖然最後一刻截到，但大家都知道，依家申請上市係dual filing制度，即係文件要同時交港交所同證監會，所以成件事驚動埋證監，知道間行犯呢啲咁低級嘅錯誤，據聞間行自然收到警告信，而有關方面亦收到指示，要特別小心睇呢間行嘅文件。
金占士