絲絲講場：調查：單身男女望五年買樓

根據調查結果顯示，64%受訪者認為至少要五年，先湊夠錢畀首期，計吓數，如果要買一個300萬元上車盤，並打算儲起70萬元首期（樓價兩成連雜費開支），以一個每月薪金1.5萬元嘅年輕人為例，每月儲5千元做投資，仲要假設年回報有5%，要用九年先可以儲夠數。即使每年人工加幅5%，都要七年零八個月先可以買樓！

勤力儲錢兼要理財

如果咁樣計落去，要五年後做業主，應該要月儲約10,250元，買少件衫、少啲出街食飯、唔好成日換手機，加埋儲蓄要每年有5%回報，又唔可以話無可能，畀啲心機做好個投資計劃咪得囉！

不過，如果要節衣縮食先可以月儲1萬元，絲絲有個更絕嘅方法，就係快啲結識生命中嘅另一半，每人每月儲7,000元做投資，五年已經可以儲到100萬啦！畀到首期之餘，仲可以結埋婚，一舉兩得！