香港住宅樓價貴成咁，攞住300萬都唔知買到乜！但呢300萬就可以買到英國樂隊「披頭四」已故成員約翰連儂（John Lennon）原本打算用嚟退休嘅島。呢個叫多里尼士（Dorinish Island）嘅島位於愛爾蘭西岸，當地人稱之為「披頭四島」，面積足足有12個足球場咁大，家陣以30萬歐元放售。
雖然掛住披頭四個名，面積多達21公頃，但個島放售咗兩個月，都未有人吼。話說約翰連儂喺六七年以1,700英鎊買咗個島，冇耐就攞到准許證，可以起屋，但喺七九年先至決定自己起番間屋嚟退休，點知第二年佢就中槍身亡，佢老婆大野洋子喺佢死後大概四年，就將個島賣畀當地農民。依家班農民年老，收山唔再放牧。
當地人話，約翰連儂生前好鍾意拎個攝影機拍全海景，即係話佢留低咗唔少腳毛喺度，但係愛爾蘭樓市泡沫爆破後一沉不起，鄰近有啲島起埋豪宅同游泳池都賣唔出，「披頭四島」都唔係咁易甩手o架。
講開又開，希臘政府繼續度緊利用周邊島嶼嚟套現減債，資產發展部確認咗有40個冇人住嘅島，可以用嚟放租長達50年，但就唔諗住賣，因為回報唔會高得過放租喎。