英倫銀行行長金默文十年任期，眨吓眼出年年中就屆滿，唔知係咪搵人艱難，英國財爺歐思邦喺國會宣布，會破天荒喺嚟緊周五出版嘅《經濟學人》，刊登廣告招聘新任行長，務求以公開同公平原則選賢能！有志者必須喺十月八日前提交申請書，經過遴選後，預計歐思邦同首相卡梅倫年底拍板，最後由英女王正式任命。
招聘廣告未正式出爐，但就透露未來行長除咗需要有激勵央行內部，以至金融市場信心嘅能力外，申請者必須具備「無可置疑嘅誠信」，言下之意就係叫啲今年牽涉入倫敦銀行同業拆息（Libor）造市醜聞嘅銀行家唔使浪費時間走去申請，咁又可能意味原本大熱門、因捲入Libor風波嘅副行長塔克無法更上一層樓。
英國博彩公司Paddy Power已經開出盤口，塔克嘅賠率為2賠5，高過金融服務局主席特納同埋前政府高官奧唐奈，佢哋嘅賠率分別係4賠7同4賠9，前者七月接受訪問時更暗示有興趣競逐英倫銀行行長寶座。
其他呼聲較高嘅人選仲包括全球金融市場所熟悉嘅「金磚四國之父」、高盛資產管理主席奧尼爾，同埋滙控（00005）前主席葛霖，賠率分別係3賠10同1賠6。