港交所（00388）行政總裁李小加，如意料般「大熱」留任，獲港交所續約三年，任期會去到一五年十月。李小加續約之餘，仲有得加人工添，睇番通告，佢續約後嘅年薪接近八百一十萬，同佢舊年大概七百五十萬嘅人工比較，加咗7.5%，港交所話，呢個人工已經參考咗金融界類似職位嘅酬金嘞。
當然，如果計埋花紅等等就遠不止此數，好似李小加舊年嘅花紅就等於佢成年薪金，於是舊年總共收咗千六萬報酬。不過港交所今年中期業績倒退咗噃，李小加真係要「奸巴爹」提升業績爭取花紅嘞！
李小加○九年十月加入港交所，之後籌劃咗好多大計，好似港股加時、期指夜市，唔少都有待完成，何況收購咗倫敦金屬交易所之後，港交所發展商品業務仲有好多工作要做，李小加真係好難離得開，所以絲絲都聽聞續約係得到董事一致贊成，依家只係等證監會批准作實。
不過李小加唔少措施都引起經紀爭議，有華資經紀就話，希望李小加嚟緊三年可以多聽業界意見，因為佢以往確實有參與聆聽業界嘅訴求，但往往係意見接受，行動照舊，呢方面好有改進空間咁話！
余詩韻