呢排個市重遊二萬，相信大家少不免睇吓有乜股份合眼緣！
九倉（00004）早前入股綠城中國（03900），備受市場關注。究竟點解九倉會睇中綠城？係佢別具慧眼，定係另有原因？
參考中國指數研究院數據，綠城集團曾經獲得「二○一二年上半年居民居住整體滿意度」第一。仲喺七項指標度全部奪冠，認真唔嘢小！自從集團一一年獲得「居民居住整體滿意度」第一之後，繼續奪取咗一二年上半年嘅「居民居住整體滿意度優秀企業」第一，可見綠城嘅產品係有實力嘅，大家話係咪？
綠城嘅強項，係產品品質同服務品質，呢兩方面一直都獲得各界好評，有勁強嘅品牌影響力。至於融創中國（01918），佢嘅強項係專案定位、專案整體運營、行銷管理同資本運作，多年嚟累積咗豐厚嘅操作經驗。兩間公司一齊組建咗上海融創綠城控股有限公司，分別持有合營公司50%股權。綠城會將旗下分布喺上海、蘇州、無錫、常州同天津區域嘅九個優質地產專案相應股權注入合營公司。
至於九倉，佢對綠城嘅戰略性投資，涉資達到51億元，當中會分為兩個步驟完成。九倉嘅出現，幫助綠城喺資金上打破內外瓶頸。綠城經過多年來的高速發展，正正需要大展拳腳，去變現自身價值。九倉加盟，一來為自己業務加添高速發展元素，更有助綠城財務穩定，助己助人。就Prof. J所見，綠城呢間公司管理層好識借力打力！
睇番數據，集團盈利近幾年都係高速增長，上年增長近七成，市盈率只有四倍，息率1.5厘。繼續追蹤、出發！
香港大學電子金融服務榮譽助理教授 徐燦傑