中國籃球界巨人姚明近年頻頻踩過畀，目標由體壇轉向投資領域。絲絲收到消息，話姚明已經接受咗兩間私募基金公司邀請，準備殺入PE（私募股權投資）領域。不過姚明嘅進取投資舉動就引起好多財經人士嘅憂慮，話球場巨人去到投資界就唔知仲會唔會係巨人啦！
據講今次呢兩間基金公司嘅總規模未來將達到66億元，睇頭一啲都唔細。絲絲睇番姚明投資嘅紀錄，發現佢嘅投資項目愈搞愈大，由以前投資一啲業餘愛好，好似巨鯨音樂網同CBA球隊，到上年開始投資更專業，規模更大嘅項目。上年年初，姚明參與咗黃杉股權基金管理有限公司嘅籌建。再過咗幾個月，姚明就接手重慶渝富弘遠股權投資基金管理公司，而姚明主要嘅工作就係用佢嘅知名度同影響力，去幫自己嘅基金募集資金啦！
依家姚明嘅投資可以話係百足咁多爪，識得分散投資固然好，不過姚明好多時都係嗰樣嘢炒到最hit時就入市，好似投資合眾思壯（中小版公司）、葡萄酒都係摸頂，雖然話佢投放嘅金額唔會太多，但今次可唔可以賺到錢就未知喇。