內地尋日盛傳，將會有一家中大型地產發展商要退出市場，轉型為類似房產基金咁用資本運作，依家正係籌備緊點樣遣散過千名員工！個消息咁嚇人，係人都好想知道究竟係邊間公司啦，咁啱個傳聞又冇提公司名。點算？互聯網嘅世界，一人一句畀意見，最終居然好似偵探咁抽絲剝繭，「確認」有兩家公司係最「可疑」。
個傳聞話，呢家房企以華南為基地，雖然唔係行業龍頭，但都算係「大佬輩」，業務除咗地產開發，仲有酒店營運，已完成建設嘅項目超過一百個，遍及全國包括北京、廣州、重慶等省市。退出房地產開發嘅原因係樓市「寒冬」未完，而公司近年發現喺資本運作、購併嘅領域收入豐厚。
就連一啲出名嘅房企董事長都喺微博度討論呢件事，有房地產分析員就憑上述資料，整合出富力地產（02777）、合生創展（00754）、保利集團、萬科集團、中海集團五家公司。網友們傾傾下，就覺得前兩間係最貼近今次嘅描述，當中尤以後者可以將業務賣畀同系珠江投資而快速套現。
講到咁似層層，作為負責嘅人，絲絲當然要打畀富力同合生求證啦。睇到呢度，大家都應該估到答案，就係兩家公司都否認要「退房」，其餘三家，就睇極都唔似。雖然最終都冇答案，但事件令絲絲驚嘆互聯網嘅力量真係好大呀！