中國燃氣（00384）嘅創辦人劉明輝歷盡波折後，終於回朝，如無意外嘅話會做番董事總經理兼總裁，重掌大權嘞。而根據證監會資料，劉明輝仲可能行使咗500萬股嘅購股權。新奧能源（02688）趁劉氏唔喺中燃嘅時候提出收購，中燃幾乎有改朝換代之虞，但依家睇嚟機會愈嚟愈渺茫，真係商場如棋局，世事如棋。
當然劉明輝要做番董事總經理，仲要過股東會一關，劉氏同北控、富地呢班主要股東嘅關係夠唔夠融洽，到時睇投票結果就一清二楚嘞。不過劉明輝回朝真係牽一髮動全身，睇番中燃出嘅嗰份通告，高層執位動作都幾大，兩名現任聯席董事總經理梁永昌同龐英學會有新嘅職務安排；曾經同劉氏一齊離開中燃嘅黃勇亦苦盡甘來，出任執行總裁。值得留意嘅係韓國SK嘅代表金容仲亦加入中燃管理層，出任副總裁。
劉明輝前年底開始無法履行喺中燃嘅職務，惟有辛苦其他幾位管理層，一人行多步嘞，不過佢哋都唔係白辛苦一場o架，事關公司係有額外酬勞嘅！通告就話，包括梁永昌同龐英學在內嘅四位管理層，可獲發特別款項同埋特別獎金，主席黃倩如亦獲發特別款項，全部加埋晒超過2,580萬大元。