絲絲講場：利豐母公司正名馮氏
眾所周知，利豐（00494）嘅大股東係以馮國經、馮國綸為首嘅馮氏家族，由成立當日開始，就以利豐集團（Li & Fung Group）呢個名作為控股公司名稱，原來佢哋喺呢個月，已經將Li & Fung Group「正名」，改名做馮氏集團，更為貼近控股股東嘅身份。
李家早售股權予馮氏
作出呢個改動，就要講吓歷史。話說1906年，利豐嘅創辦人馮柏燎同李道明喺廣州成立利豐貿易公司，Li & Fung就係兩人姓氏諧音合稱，呢間亦係當時中國第一間華資對外貿易出口商。
直至1943年，馮柏燎過身後，業務就交咗畀馮氏家族第二代，之後一向唔參與業務管理嘅拍檔李道明宣布退休，將所擁有嘅利豐股權全部賣畀馮氏家族，不過Li & Fung嘅名就延用至今。
佢哋已經將網站資料改埋，網站名都改埋做馮氏集團，利豐大股東以後就叫做馮氏集團。至於業務方面，就沿用將核心業務清晰分開。
利豐作為上市公司，依然着重貿易、物流、分銷，馮氏集團就專注零售業務，好似已上咗市嘅利亞零售（00831）、利邦控股（00891），未上市嘅就有利時控股、利童、玩具反斗城。
余詩韻