Market Insight：富士康見好即收

昨日儘管先跌後企穩，收市恒指跌11點報20,104點，但主板成交比上周五縮水近百億元，得378億。個市水盡鵝飛，好的角度睇係要沽貨嘅基金唔多，市底也漸漸在兩萬點水平達到平衡。值得注意，港股已經十一個交易日，困在19,911至20,300點之間不到四百點內浮沉，即使買賣兩閒，淡友卻未有放軟手腳，連續七日沽空成交比例企穩一成樓上（昨日11.02%），累積沽空愈多，意味市況一旦突破，淡友被挾的可能性正在上升。

中移（00941）七月3G上客量，按月減少32.5%至190.1萬戶，十五個月以來首次低於200萬戶，數據令捧場客失望，昨日再跌1.3元報82.35元，睇番業績後短短四日，股價累積跌逾一成。

放大圖片

放大圖片

聯通中移差之千里

反之收市後聯通（00762）3G上客數字錄得淨增長308.7萬，幾乎比中移多出六成二。年初聯通出到15至20元（人民幣‧下同）割喉式月費搶3G客，每個月飄忽不定的上客數字，筆者已不會太過在意，倒不如等埋周四份中期成績表，瑞銀預測收入升13.6%至1,026億元，EBITDA及盈利分別錄得355億及33億元，增長10.8%及25.4%。老土講句，中移、聯通估值是天與地，一二年分別係10.5倍及31倍，面前即使有不利因素困擾中移，也好難說服勉強投入聯通懷抱。

陸續有內銀股發成績表，其中招商銀行（03968）半年多賺兩成多，表現符預期，但股價仍要跌1%，主要係市場關注次季淨息差按季收窄情況會否持續。至於唔少大行睇淡中績表現嘅重農行（03618），出嚟嘅成績唔係太差，股價逆市反彈逾2%。

內銀股睇定才撈底

此外，中行（03988）亦會喺本周四宣布中績，八月以來股價持續喺250日線2.96元（港元‧下同）徘徊，期間沽空股數高企，唔排除空軍有所部署，故建議股民唔好見到隻股重返牛熊分界線就心動，等埋份中績出爐再謀定而後動。

近期華爾街氣氛唔錯，多少要多得第一大市值股蘋果公司，上星期股價高見648美元創新高，年初至今股價已累積六成升幅，次按海嘯、歐豬爆煲好似通通同佢毫無關係一樣。分析機構Jefferies上星期出報告話同零部件供應及供應鏈管理商收風，7吋迷你iPad已交付代工商開工生產，另外，早前大行預測，迷你iPad會和潮人朝思暮想的iPhone 5，在九月十二日新產品發布會上公布，九月廿一日全球發售。

正因為迷你版iPad及iPhone 5消息，台灣幾間代工及供應商如鴻海、鴻準等一早被炒高，香港上市幫蘋果組裝產品的富士康（02038），昨日收市價2.93元，比七月低位2.22元，足足反彈32%。

押注新產品要小心

好奇心驅使，搵過去幾代iPhone發布前富士康走勢，結果頗令人意外，實情跌多升少，第一代iPhone在○七年九月五日公布，前一個月富士康跌7.6%，之後情況都差唔多，iPhone 3G推出前跌37.6%，iPhone 3GS跌2.9%，iPhone 4跌1.2%，最叻係iPhone 4S升8.6%，可見押注新產品推出在即，其實無往績根據。當然，近年其經營狀況實在差勁，業績一直流血不無關係。

有一點頗有趣，○六年富士康股價高見27.7元歷史高位時，幾乎通街分析員建議客仔買貨，其後股價點走，有五年以上股齡的都心照，曾躋身藍籌的富士康，一○年七月打後足足十三個月，彭博顯示竟連一間喊「BUY」的大行都無，可算是富士康黑暗期，期間股價由5.5元升至6.35元掉頭，碌落3.2元，事實無任何投機、投資機會，但逆轉故事始終最吸引分析員，最近一季再見有大行開始因為業績由紅轉黑，開始睇番好。

下周一富士康出成績表，炒逆轉故事仲有幾日安全期，讀者可以一試，但最緊要懂得見好就收。

古勝